Просечната јунска нето плата во Хрватска изнесувала 1.444 евра, што е номинално пониско за 0,5 проценти, а реално за 0,7 проценти во споредба со мај, објави денес Хрватскиот завод за статистика (ДЗС).

На годишно ниво, просечната хрватска нето плата е номинално повисока за 9,8 проценти, а реално за 5,9 проценти во споредба со јуни 2024 година.

Највисоката просечна месечна нето плата по вработен за јуни 2025 година е исплатена во категоријата воздушен транспорт и изнесува 2.279 евра. Спротивно на тоа, најниската просечна нето плата во Хрватска во јуни е регистрирана во производството на облека и изнесува 926 евра.

Медијалната нето плата во Хрватска за јуни изнесувала 1.233 евра, што значи дека половина од вработените во Хрватска заработуваат помалку од таа сума.

Медијалната плата е износот на плата кој ја дели групата вработени на половина, односно 50% од вработените добиваат плата под тој износ, а 50% над тој износ и ја прикажува реалната „средна“ плата во општеството.