Хајди Клум и Кевин Харт ќе бидат водители на извлекувањето на ждрепките за СП во фудбал за 2026
Познато е кои ќе ги водат ждрепките за групите на Светското фудбалско првенство 2026 година, кое ќе се одржи во петок, на 5 декември, во „John F. Kennedy Center for the Performing Arts“ во Вашингтон. Според соопштението на ФИФА, тоа ќе бидат германската супер-моделка и продуцентка Хајди Клум и американскиот комичар и актер Кевин Харт. Во програмата ќе учествува и актерот и продуцент Дени Рамирез, пренесува „Фокс спортс“.
Препорачано
„Да бидам повторно дел од завршните ждрепки, 20 години по моето учество на ждрепките во Германија, е навистина неверојатно“, изјави Клум. „Светското првенство го собира светот како ништо друго, а да бидам повторно дел од таа магија, на уште поголема сцена со три домаќини и 48 тимови, е огромна чест“, додаде таа.
Во живо, на отворањето ќе настапат Андреа Бочели, Роби Вилијамс, Никол Шерзингер и Village People.
Ждрепката за групите ќе започне во петок, 5 декември, во 18 часот по македонско време. Ден подоцна, на 6 декември, ФИФА ќе го објави и целиот распоред на натпревари, со доделени стадиони и време на почеток на секој меч.
