Постои загриженост на пазарот во Грција дали земјата ќе може да одржи соодветни резерви на гориво доколку кризата во Персискиот Залив продолжи. Тоа е затоа што нарушувањето што веќе е предизвикано во глобалниот синџир на снабдување врши притисок врз високите залихи и вишокот производство на локалните рафинерии, јавува Катимерини.

„Целосно сме обезбедени за два месеци. Доколку пловидбата во Ормускиот Теснец не се обнови, ситуацијата подоцна ќе стане потешка,“ изјави висок извршен директор од рафинерискиот сектор за „Катимерини“.

Грција има четири рафинерии, во Аспропиргос, Елефсина и Солун од „Хеленик Енерџи“, како и во Агиои Теодорои од „Мотор Оил“, со вкупно производство на основни нафтени деривати (бензин, дизел, гориво за греење, авионско и бродско гориво) што ја надминува домашната побарувачка. Повеќе од 50% од производството се извезува, додека безбедносните резерви ги надминуваат задолжителните количини за покривање на побарувачката за 90 дена.

Грчките рафинерии морале да ги заменат снабдувањата од Заливот со пратки од алтернативни извори кои овозможуваат производство со полн капацитет до почетокот на јуни.

Сепак, долготрајна криза на Блискиот Исток се очекува дополнително да го влоши и онака ограниченото глобално снабдување со нафта, што ќе го направи потешко и поскапо за рафинериите во земјата да набавуваат сурова нафта, пишува Катимерини.

Му се заканува ли на светот нафтена криза како онаа од 70-тите?

За Македонија, пак, премиерот Христијан Мицкоски пред неколку денови убедуваше дека состојбата со нафтените деривати е стабилна и непроменета.

„Нафтените резерви се такви какви што беа пред почетокот на кризата, не е потрошен ниту еден литар“, изјави Мицкоски, дополнувајќи дека, следејќи ги цените на берзите на нафтените деривати, најверојатно цените на горивата во земјата ќе останат исти или ќе бидат намалени.

Не е потрошен ниту литар од нафтените резерви, состојбата со горивата е стабилна – вели Мицкоски