Градоначалникот на Осиек: Концертот на Ана Бекута и Кеба нема да се одржи во нашиот град
Откако беше забранет во Пула, концертот на турбофолк ѕвездите Душко Кулиш, Драган Којиќ – Кеба, Ана Бекута и Зорана Миќановиќ нема да се одржи ни во хрватскиот град Осиек, каде што организаторите од продукцијата „Хилјадарка“ планираа да го преместат.
За разлика од Пула, каде што организаторите потпишале и договор за одржување на концертот, во Осиек не ни дошло до такво нешто. Градоначалникот на Осиек, Иван Радиќ смета дека таквиот тип музика е неприфатлив за градскиот простор.
„Осиек е средноевропски град, кој има изразена европска димензија, град кој интензивно се развива во вистинска словенска метропола, град кој ја има најголемата културна манифестација во Источна Хрватска – Осиекското лето на културата, која докажува дека таа култура и уметност совршено ѝ одговараат на градот на Драва.
Исто така, Осиек е и град на концети, забава и дружење. Иако не мислев дека меѓу приоритетите со кои секојдневно се занимавам ќе се најде и прашањето за тоа кој ќе изнајми сала за концерти, мора да се постават некои граници.
Одлуката за неодобрување на турбофолк концертот во градската сала повлекува различни дебати за тоа каде и како да се повлече линијата. Тоа не значи дека оваа одлука не треба да се донесе. Од медиумите дознавам дека нашиот град е претставен како заменска, но сигурна опција за организација на турбофолк концерт (иако, помалку важно за оваа тема, договорот со салата не е потпишан).
Со оглед на идентитетот на градот што го развиваме и кон кој целиме, ваквата „промоција“ секако не е правиот и посакуван пат што го поддржувам. Не сакам да влијаам врз личните музички преференци, но сметам дека треба да се биде селективен во изборот на содржините што се нудат на јавниот и градскиот простор.
Како заклучок, концертот кој стана предмет на дискусија нема да се одржи во градот Осиек“, пишува градоначалникот Радиќ.
Повеќе на оваа тема:
„Нема место за турбофолк“: Градоначалникот на Пула забрани концерт на Ана Бекута и Кеба
Ана Бекута се огласи за концертот во Пула: Ѓубрето не може да биде српско или хрватско