Двапати се заменуваа плочките на плочникот кај Порта Македонија, кој целосно беше реконструиран и уреден пред пет години. Но поради негрижата на надлежните потоа и поради непреченото движење на возилата и на комбињата за достава кон градскиот плоштад, за кратко време плочките беа уништени.

Откако „Слободен печат“ алармираше за состојбата, Град Скопје реши да забрани влез на автомобили од кај Портата, освен за жителите на зградите на плоштад, а плочките беа обновени, беше поставена куќичка со редари кои не дозволуваа влез. Сепак и покрај тоа, непослушните скопјани никој не можеше да ги запре, па за кратко време плочките повторно беа искршени, а просторот пред Портата се претвори во паркинг за диви таксисти и за доставувачи.

И конечно Градот се досети дека може и поинаку. Откако по вторпат се заменија искршените плочки, од неодамна се постави рамка, која се подига само за влез на жителите. Во изминативе денови тука патролираат и полицајци, па таксистите – ги снема.

Конечно овој просторот заличи како што треба. Но прашање е, до кога? Останува уште малку да се подзачисти.