Голем интерес за ретроспективната изложба на Тања Балаќ во Чифте амам

Централен ликовен настан минатата седмица во Скопје беше отворањето на ретроспективната изложба на слики, објекти, инсталации, видеоарт и експериментални филмови на македонската уметница Тања Балаќ.

Изложбата се организира по повод 30 години нејзино творештво, беше отворена на 31 август во објектот Чифте амам при Националната галерија, а на отворањето се обратија Дита Старова Ќерими, директорка на Националната галерија, историчарите на уметност и ликовни критичари, Натали Р. Павлеска и Кирил Пенушлиски, како и Тања Балаќ.

Тања Балаќ (р. 1968 година, Скопје), во 1991 година дипломира на Факултетот за ликовни уметности во Скопје, на одделот за сликарство. Трасирајќи го својот уметнички и професионален пат низ годините, во 2008 година, магистрира на Факултетот за ликовни уметности во Скопје, на одделот за сликарство. Членка е на Друштвото на ликовни уметници на Македонија (ДЛУМ) од 1996 година, а во периодот од 2006-2013 година и негова претседателка.

Меѓу многубројните професионални посети надвор од границите на Македонија, остварува студиската посета во Париз во 2003 година. Своето професионално и уметничко искуство постојано го збогатува со работни и студиски посети во странство, учество на меѓународни фестивали и изложби, за кои има добиено повеќе награди и признанија. Покрај сликарството, во последната декада истражува и на полето на нови медиуми, вклучувајќи инсталација, експериментален филм и видео уметност.

Истовремено со отворањето на изложбата беше промовирана и монографијата „Тања Балаќ – 30 години – Артворкс“.

(Текстот и фотографиите се објавени во „Културен печат“ број 95, во печатеното издание на весникот „Слободен печат“ на 4-5 септември 2021)

Видео на денот