Принцезата Дијана е родена на денешен ден во 1961 година, како Дијана Франсис Спенсер, во близина на Сандрингем, Англија, во угледно аристократско семејство. Таа е ќерка на Едвард Џон Спенсер и Френсис Рут Бурк Рош, а расте со две постари сестри и помладиот брат Чарлс. Нејзините родители се разделуваат кога била девојче, а подоцна таа често зборува дека нејзиното детство било исклучително нестабилно.

Се школува во неколку приватни училишта, меѓу кои Ридлсворт Хол и Вест Хит. Иако не е одлична ученичка, покажала талент за музика, танц и работа со деца. По завршувањето на образованието се преселува во Лондон, каде што работи како помошничка во детска градинка.

Со принцот Чарлс се запознава во 1977 година, додека тој е во врска со нејзината постара сестра Сара. Неколку години подоцна повторно се сретнуваат, а нивното познанство брзо прераснува во љубовна врска што привлече огромно внимание од британските и светските медиуми. Чарлс ја запросува Дијана на почетокот на февруари 1981 година во замокот Виндзор, а свршеничкиот прстен со голем син сафир и дијаманти стана едно од најпознатите парчиња накит во светот.

– На деветнаесет години човек секогаш мисли дека е подготвен за сè и дека знае што го очекува во иднината. Иако тогаш ме плашеше помислата на сè што ме чекаше, чувствував дека ја имам поддршката од мојот иден сопруг – изјавила Дијана во интервју за Би-би-си во 1995 година.

Нивната свадба се одржа на 29 јули 1981 година во катедралата „Свети Павле“ во Лондон. Церемонијата ја следеа речиси една милијарда гледачи ширум светот, поради што често е нарекувана „свадба на векот“. Дијана носеше раскошна венчаница од свила и чипка, украсена со дури 10.000 бисери, како и превез долг повеќе од седум метри. За време на церемонијата прекрши една од кралските традиции, изоставајќи го зборот „да се покорувам“ од брачните завети, што тогаш предизвика бројни реакции во јавноста.

По венчавката стана Дијана, принцеза од Велс, но животот во рамките на кралското семејство се покажа многу потежок отколку што очекуваше. Постојаното медиумско внимание, строгите правила на дворот и емоционалната оддалеченост меѓу неа и Чарлс постепено доведоа до сериозни брачни проблеми. Дијана отворено зборуваше и за депресијата, булимијата и чувството на осаменост што ги одбележаа нејзините први години во кралското семејство.

– Силно посакував нашиот брак да успее. Искрено го сакав мојот сопруг и сакав со него да споделувам сè. Верував дека сме одличен тим – раскажувала принцезата.

И покрај личните проблеми, најголемата среќа ја пронајде во улогата на мајка. Со Чарлс доби два сина – принцот Вилијам, роден во 1982 година, и принцот Хари, роден две години подоцна. Дијана настојуваше да им овозможи што е можно понормално детство, па ги водеше во забавни паркови, ресторани за брза храна и на различни јавни настани, за да го запознаат секојдневниот живот надвор од ѕидовите на кралската палата.

Во исто време станува сè поактивна во хуманитарната работа. Посетува болници, засолништа за бездомници, центри за лица заболени од сида и им пружа поддршка на деца и луѓе во потреба. Во време кога предрасудите кон лицата заболени од сида беа многу силни, Дијана ги рушеше стереотипите така што се ракуваше со пациентите без заштитни ракавици, испраќајќи силна порака за сочувство и прифаќање. Особено се ангажира и во кампањите за забрана на противпешадиските мини, посетувајќи со војна погодени подрачја, како Ангола.

Како што минуваат годините, проблемите во нејзиниот брак станаа сè поочигледни. И Дијана и Чарлс беа поврзувани со вонбрачни врски, а нивната меѓусебна оддалеченост повеќе не можеше да се сокрие од јавноста. Официјалната разделба беше објавена во 1992 година, а разводот беше финализиран четири години подоцна. Дијана ја задржа титулата принцеза од Велс, но го изгуби звањето „Нејзино Кралско Височество“ и сите права поврзани со наследувањето на британската круна.

– Очајно барав помош, но тоа го покажував на погрешен начин. Луѓето ја претворија мојата булимија во етикета со која објаснуваа сè друго. Заклучија дека проблемот е во мене, дека Дијана е нестабилна – изјавила принцезата.

По разводот продолжува со својата хуманитарна работа, поради што многумина сè уште ја паметат како „принцеза на народот“ и остана една од најомилените личности во светот.

Во последните месеци од животот беше во врска со претприемачот Доди Фајед. Нивната врска предизвика огромен интерес кај медиумите, а папараците постојано ги следеа.

Трагичната несреќа во кој таа го изгуби животот се случи во раните утрински часови на 31 август 1997 година во Париз. Автомобилот во кој се наоѓаа Дијана и Доди Фајед со голема брзина удри во столб во тунелот Пон де л’Алма. Доди Фајед и возачот загинаа на местото на несреќата, додека Дијана почина неколку часа подоцна во болница во Париз, како последица на здобиените повреди. Имаше само 36 години.

Веста за нејзината смрт предизвика шок и тага низ целиот свет. Милиони луѓе оставаа цвеќе пред Кенсингтонската палата, а нејзиниот погреб на 6 септември 1997 година го следеа околу две и пол милијарди гледачи. Особено емотивен момент беше кога нејзините синови, тогаш петнаесетгодишниот Вилијам и дванаесетгодишниот Хари, чекореа зад ковчегот на својата мајка за време на погребната поворка. На церемонијата во Вестминстерската опатија, Елтон Џон ја изведе специјалната верзија на песната „Candle in the Wind“, посветена токму на Дијана.

По нејзината смрт беше основан Меморијалниот фонд на принцезата Дијана, кој продолжи да поддржува бројни хуманитарни проекти.

Шише шампањ од свадбата на принцезата Дијана и принцот Чарлс оди на аукција, се очекува да достигне цена до 80.000 евра