Го продала дуќанот, а поради долгови на купувачот ѝ ја блокирале пензијата
Љиљана Спировска од Скопје продала дуќан во 2003 година, но потоа ѝ била блокирана сметката дури двапати, и тоа за долг за вода, за кој таа тврди дека е од купувачите на дуќанот.
– Првиот пат ми земаа 28.906 денари од сметка во 2009 година, а дуќанот го продадов уште во 2003 година. Јас знам дека ги плаќав сите сметки и затоа побарав на увид да ја видам тужбата од Водовод, но не ја добив. По 9 години, од пензијата ист извршител ми зеде 3.925 денари, а во овој дуќан сега, пак, имаше трет газда. Пак не добив ништо на увид, но ми рекоа да уплатам за тужба 1.159 денари. Го направив тоа, а веќе наредниот ден ме известија дека стигнало ново побарување по нов предмет. Јас веќе не знам ни за кого плаќам, ни за што ме тужат. Никаков увид немам – револтирано ни ја раскажа својата приказна Спировска.
Спировска и уште педесетина граѓани вчера дојдоа на протестот против извршителите што се одржа пред Министерството за правда. Секој од присутните во рацете држеше куп документи и секој сакаше да ни ја раскаже својата приказна.
Расема Мехмед тврди дека долг од 500 евра, ѝ станал 9.800 евра.
– Топлификација ми најде долг од 500 евра, а не сакаше да ми ги пребие двојно платените сметки. Откако се разведов со сопругот, излезе дека двојно сме плаќале исти сметки. Одев со денови да се расправам и да барам пребивање на долгот со натплатеното, но ништо од тоа. Затоа, пак, долгот од 500 евра ми се претвори во 9.800 евра – вели Мехмед.
Емина Контурси, пак, вчера дојде на протестот од Берово.
– Одамна го отплативме кредитот, но излезе дека имало некои неплатени банкарски трошоци од 8.000 денари, а за тој долг, на сопругот му ја блокираа пензијата и тоа за износ од 60.000 денари. Маж ми почина, а јас го наследувам долгот. Мојата приказна е страшна. Ние се задолживме за да ги донесеме телата на син ми и на моите родители од Турција, каде што загинаа. Оттогаш не сум способна ни да работам ни ништо… Сега уште и без пензијата на маж ми, не знам како ќе издржам – вели Контурси.
Претставничката на невладината организација „Стоп на извршителите“ Ана Глигорова ги повика граѓаните да ги достават своите приговори за предмети од извршители до Министерството за правда.
– Направени се многу злоупотреби од извршителите. Под злоупотреба подразбирам ненавремено известување, суми што не кореспондираат со основниот долг… Сите тие поплаки граѓаните може да ги напишат на лист и да ги поднесат до Министерството за правда, кое има ингеренции врз извршителите, тоа ги назначува и ги разрешува извршителите – рече Глигорова.
Случајот „Македонска банка“ застаре за Груевски, ама не и за граѓаните
Здружението „Стоп за извршителите“ бара извршителите да не можат да блокираат сметки, затоа што така луѓето целосно се оставаат без пари, наплатата да не трае подолго од две години, а да постои и застареност на долгот.
– Не може кривичното дело на Груевски за Македонска банка да застари, а да постојат долговите на граѓаните кон оваа банка што 12 години не постои – категорична е Ана Глигорова од Здружението.