“Герила” акција на “Поинаку” против политиките на локалната власт
Разидувањата меѓу советниците на независната листа “Поинаку” и локалната власт во Битола денеска ескалираа.
Претседателката на Советот на Општина Битола, Габриела Илиевска и советниците на “Поинаку” Иван Чулаковски и Алмир Адемовски на денешната прес-конференција на битолскиот градоначалник Тони Коњановски што ја одржа во делот на поранешната Касарна на која се врши асфалтирање на улица, се појавија во испишани маички.
-Маиците од времето на Двојче се враќаат во мода. Истите приказни, истата матрица, истите ликови, истиот режим.
Никогаш да не се повтори!!! #лажи #кради #поинаку, објавија независните советници на “Поинаку” на нивната фејсбук страница.
На прашањето на “Слободен печат” дали независните советници на “Поинаку“ кои до скоро беа во неформална коалиција со ВМРО-ДПМНЕ во Советот на Општина Битола, на ваков начин со герила акции ќе ја водат политичката борба, претседателката на Советот Илиевска ни одговори:
-Ставот на “Поинаку” е јасен во изминатите шест години и од него не отстапуваме. Сето она што не ни се допаѓа во Битола јавно ќе го коментираме и тоа е наше право-вели претседателката на Битолскиот Совет, Габриела Илиевска.
Битолчани ја паметат “герила“ акцијата на советникот на “Поинаку” Иван Чулакоски кога на поранешниот градоначалник од ВМРО-ДПМНЕ Владимир Талески му фрлаше печатени “банкноти“ наречени “владимирки“ на неговите прес-конференции.
Васка М Младеновска