Поранешниот бугарски репрезентативец, Благој Георгиев, кој е заинтересиран за преземање на најтрофејниот македонски клуб Вардар, се пожали дека некој работи против него.

Георгиев изминатиот период во бугарските медиуми најавуваше дека заедно со група инвеститори е заинтересиран за преземање на Вардар, но сега се пожали дека некој во Македонија сака да го саботира неговиот обид.

– Тимот има потенцијал да направиме големи нешта, ама не сакам да зборувам за нешто што не се случило сè уште. Пред неколку денови се појавија информациите за Вардар и веќе слушнав многу лоши работи за сето тоа. Некои се обидуваат да го урнат проектот. Затоа и повеќе не сакам да коментирам ништо во овој момент – изјави Гепргиев за бугарските медиуми.

Несудениот шампион за оваа сезона, Вардар се наоѓа во големи финансиски проблеми откако Сергеј Самсоненко се откажа од клубот, а градот нема намера да го презема клубот со долгови бидејќи во договорот со поранешниот сопственик стои дека тој треба да го врати клубот без никакви долгови.

Вардар е во „дупка“ од околу два милиони евра, а виси и настапот во Европа бидејќи голема е веројатноста доколку не се реагира веднаш, клубот да остане без лиценца за настап во европските купови.