Настаните и забавите на кои мобилните телефони се забранети стануваат сè попопуларни меѓу младите ширум светот. Генерацијата Зет и милениумците сè почесто избираат „офлајн“ дружби, со цел да ги подобрат социјалните вештини, да запознаваат луѓе во живо и да избегаат од постојаната онлајн присутност.

Според податоците на платформата „Ивентбрајт“, бројот на вакви „без телефони“ настани пораснал за 567 проценти меѓу 2024 и 2025 година, додека посетеноста се зголемила за 121 процент.

Организаторите на ваквите собири бараат од посетителите да ги остават телефоните настрана, во посебни кутии што се заклучуваат, или едноставно да не ги користат во текот на вечерта. Наместо снимање видеа, разгледување на социјални мрежи и проверување нотификации, фокусот е ставен на разговор, музика, танцување и вистинска комуникација.

Многу млади признаваат дека по години поминати на социјални мрежи, чувствуваат анксиозност во комуникацијата лице в лице и тешко воспоставуваат контакти без помош на телефонот. Токму затоа, овие „офлајн“ забави ги гледаат како начин повторно да ги развијат социјалните навики.

Најголем раст е забележан во Велика Британија, каде бројот на вакви настани пораснал за 1.200 проценти, а посетеноста за 1.441 процент. Во САД, посетеноста скокнала за дури 913 проценти.