Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – ѓомлезе.

– Откријте го начинот на подготовка на ова автентично јадење и уживајте во неговиот неодолив вкус. Секој залак ќе ви донесе магичен вкус и топлина на вашата трпеза. Уживајте во вкусното и ароматично ѓомлезе – порачува Бобе.

Состојки за тесто:

– 600 грама брашно
– вода по потреба
– 1 лажица сол
– 50 мл масло

Фил:

– главица лук
– 1 лажичка сол
– 100 мл масло
– 150 мл врела вода
– 200 грама ореви

Подготовка:

Во длабок сад се прави каша од брашно, сол, масло и вода по потреба. Кашата треба да биде течна и густа. Питулиците од смесата се пржат по една. Во загреано тавче, премачкано со масло, се сипува од смесата колку да се покрие целото тавче, кога ќе се запече од едната страна и ќе се одвои од тавчето се врти да се пече и од другата страната. Потоа се редат во чинија една врз друга. Потребни се 25-30 питулици за да се подготви ѓомлезето.

Прелив: Во аван се толчи лукчето со сол и се прелива со врела вода, се меша, па се додава маслото.

Во длабока намастена тава се реди питулица, се мачка со подготвениот прелив од лук, вода и масло и се посипува со толчени ореви, постапката се повторува сѐ додека не завршат питулиците, редењето завршува со питулица. Се сече на осминки и се прелива со останатиот прелив, одозгора се покрива со алуминиумска фолија и се пече 30 минути, во загреана рерна на 220 степени, потоа се отстранува фолијата и се пече уште 10 минути додека зарумени.

Овој рецепт ќе ви донесе автентичен вкус од традиционалното ѓомлезе на вашата трпеза.