Во најтешките моменти во мојата кариера, а такви имало многу, не сум се откажал и ме охрабрува фактот дека активистите веќе се мобилизираат. Ова е впечатокот на Венко Филипче носител на листата на СДСМ за Четвртата изборна единица, откако денес ги продолжи активностите на терен.

На својот Фејсбук профил, Филипче пишува дека разговарал со граѓаните и со поддржувачите и за изборниот резултат.

-Природно е да се чувствуваме обесхрабрени при ваков резултат. Но, големината на еден човек не се гледа во победите, туку во поразите – вели Филипче.

Како што наведува тој, СДСМ и тој лично ја примиле порака од оние кои не излегле да гласаат во првиот круг на претседателските избори. А таа порака е:

-Потребни се темелни промени со кои мора да се зафатиме веднаш после изборите. Но, сега е време за работа и воопшто не е сеедно колку пратеници ќе има СДСМ во идното Собрание. Имаме одлични кандидати кои ќе ги бранат интересите на граѓаните –  додава Филипче на Фејсбук.

Филипче вели дека го охрабрува фактот дека активистите веќе се мобилизираат и постојат големи шанси изборниот резултат да биде поправен.

-Да ги подигнеме главите и да продолжиме да се бориме за она во што веруваме – вели Филипче.

Тој додава дека  имаат одлични кандидати кои ќе ги бранат интересите на граѓаните и дека  сега не е момент за откажување.