Вардар со победа ја затвори шампионската сезона, откако во последното коло славеше против Бутел со 36-34 во натпревар исполнет со неизвесност.

„Црвено-црните“ титулата ја обезбедија уште пред неколку кола, а денеска пред своите навивачи ги добија шампионскиот пехар и медалите. Иако средбата првично требаше да се игра во Бутел, гостинскиот тим му излезе во пресрет на новиот шампион, па натпреварот се одигра на теренот на Вардар за клубот на домашен терен да го прослави трофејот.

Во најголемиот дел од мечот се водеше израмнета борба, но вардарци во завршницата го засилија ритамот и успеаја да стигнат до 30. победа сезонава.

Најефикасни во победничкиот состав беа Урош Митровиќ и Харуки Кавада со по шест голови, додека кај Бутел се истакнаа Дејан Михајловиќ и Тодор Узунчев со по осум погодоци.