ГАЛЕРИЈА | Се руши модуларната ковид-болница кај Инфективна, на нејзино место ќе се гради катна гаража на Клинички
Утринава почна рушењето на модуларната болница во близина на Инфективната клиника. Багерите ја срамнија со земја конструкцијата која својата намена ја имаше во пандемијата со ковид 19, но подоцна беше руинирана, со пропаднати подови и без никаква функција. На местото на модуларната болница како што потврдија за „Слободен печат“ високи извори во Министерството за здравство, ќе никне една од трите предвидени катни гаражи со кои треба да се реши сообраќајниот хаос на Клинички центар. Капацитетот на обезбедени паркинг-места на ваков начин ќе биде до 1.000 возила наместо досега најавените 500.
Препорачано
Локациите на кои се планира да се изградат монтажните катни гаражи се во близина на ГАК, во близина на хелиодромот и во близина на Инфективната клиника.
Решено е административното прашање за земјиштето на кое ќе бидат овие гаражи. Земјиштето му е предадено на Министерството за здравство, за тоа понатаму да му го отстапи на Град Скопје, а потоа Градски паркинг да почне со изведбата. Парите за проектот ќе бидат обезбедени со ребаланс на буџетот на Град Скопје.
Според одговорите што ги добивме од Град Скопје, во моментов е во тек изработка на проектната документација, по чијашто финализација ќе следи утврдување на динамиката на градба. Средствата за реализација на проектот ќе бидат обезбедени преку ребалансот на Буџетот на град Скопје. Монтажните катни гаражи ќе ги изведува градот Скопје, додека со нив ќе стопанисува ЈП „Градски паркинг”, со што ќе се обезбеди ефикасно и организирано управување со новите капацитети.
Во однос на цената на паркинг-услугите, оттаму велат дека нема да има промена во цената за еден час паркирање.
Паралелно со изградбата, ќе се реализира и подобрување на сигнализацијата и воведување современи смарт табли кои во реално време ќе ги информираат возачите за расположливите паркинг места, како и појасна организација на сообраќајот во зоната на Клиничкиот центар.
