Сообраќајниот хаос во Клинички центар „Мајка Тереза“ годинава ќе биде решен не со две монтажни катни гаражи како што првично беше најавено, туку ќе бидат изградени три, дознава „Слободен печат“ од високопозиционирани извори во Министерството за здравство. Според нив, капацитетот на обезбедени паркинг-места на ваков начин ќе биде до 1.000 возила наместо досега најавените 500.

Локациите на кои се планира да се изградат монтажните катни гаражи се во близина на ГАК, во близина на хелиодромот и во близина на Инфективната клиника.

Решено е административното прашање за земјиштето на кое ќе бидат овие гаражи. Земјиштето му е предадено на Министерството за здравство, за тоа понатаму да му го отстапи на Град Скопје, а потоа Градски паркинг да почне со изведбата. Парите за проектот ќе бидат обезбедени со ребаланс на буџетот на Град Скопје.