Фреската „Страшниот суд“ на Микеланџело, монументалното ремек-дело што ги прикажува рајот и пеколот и доминира во Сикстинската капела, е подложена на темелно чистење кое ќе трае три месеци, соопшти Ватикан.

Ова е прва поголема интервенција врз фреската по 1994 година. И покрај работите, Сикстинската капела ќе остане отворена за посетители, иако дел од погледот кон фреската ќе биде привремено попречен поради поставената скела, соопштија од Ватиканските музеи.

Целта на чистењето е отстранување на наслагите од микрочестички кои со години се таложеле на малтерот, главно поради огромниот број посетители. Од музејот ја опишуваат оваа појава како „широко распространета белузлава превлака, создадена од таложење на микрочестички од странски материи пренесени преку движењето на воздухот“.

Повеќе од шест милиони луѓе годишно ги посетуваат Ватиканските музеи, а Сикстинската капела е меѓу најпосетуваните простори. Поради големата фреквенција на посетители во релативно мал простор, Ватикан постојано ги следи нивото на влажност и температура, преземајќи превентивни мерки за заштита на уметничките дела.

Капелата го носи името на папата Сикст IV, голем покровител на уметноста, кој ја надгледувал изградбата на главната папска капела во 15 век. Подоцна, папата Јулиј II му ја доверил на Микеланџело изработката на фреските.

Ренесансниот мајстор го осликал славниот таван на капелата, вклучувајќи ја и сцената „Создавањето на Адам“, меѓу 1508 и 1512 година, а подоцна се вратил за да ја изработи и фреската „Страшниот суд“ на ѕидот зад олтарот.

Сикстинската капела неодамна беше и местото каде што се одржа мајската конклава на која беше избран папата Лав XIV.