Француската влада најави дека ќе започне процес на замена на дел од своите компјутери кои моментално работат на „Виндоус“ со оперативниот систем „Линукс“, како дел од поширока стратегија за намалување на зависноста од американските технолошки компании, јавува „ТекКранч“.

„Линукс“ е оперативен систем со отворен код, кој е бесплатен за користење и постои во различни прилагодени верзии наменети за специфични потреби и институции. Француските власти нагласуваат дека целта на оваа транзиција е зајакнување на дигиталниот суверенитет и поголема контрола врз податоците и инфраструктурата на државата.

Францускиот министер Давид Амиел изјави дека државата сака да „ја врати контролата врз својата дигитална судбина“, додавајќи дека е неприфатливо јавните институции да немаат целосна контрола врз своите податоци и системи. Според него, зависноста од странски компании претставува ризик за националната безбедност и дигиталната автономија.

Процесот ќе започне во државната дигитална агенција ДИНУМ, но засега не е објавен конкретен временски рок ниту кои „Линукс“-дистрибуции ќе бидат користени. Засега нема ниту официјални информации за тоа колку државни компјутери ќе бидат опфатени во првата фаза.

Овој потег се надоврзува на пошироката европска тенденција за намалување на зависноста од американски технолошки гиганти и развој на сопствени решенија во областа на дигиталната инфраструктура и облак-услуги. Во последните години, европските институции сè почесто ја нагласуваат потребата од таканаречен „дигитален суверенитет“.

Ирански хакери им ги укочија компјутерите на албанските пратеници, им оставија порака: „Поблиску сме одошто мислите“