ФОТО+ВИДЕО | Италијанска убавина: Моника Белучи на премиера на филм во Солун
Италијанската актерка Моника Белучи присуствуваше на синоќешната премиера на филмот „Марија Калас, писма и мемоари“ („Maria Callas: Letters and Memoirs“), во рамки на 64. издание на Меѓународниот филмски фестивал во Солун, Грција.
Имено, станува збор за филм на Том Волф и Јанис Димолицас, во кој Белучи во монолог чита извадоци од писмата на врвниот сопран Калас.
На црвениот тепих пред солунското кино беше пречекана од голем број фанови, додека пак пред проекцијата кусо рече дека Грција е длабоко во нејзиното срце.
„Многу сум среќна што сум тука. Ви благодарам за поканата. Како што сите знаете, Грција е длабоко длабоко длабоко во моето срце. Не сакам да кажам многу за филмот, ќе го откриете сами. Уживајте во проекцијата“, рече Белучи на синоќешната премиера, а пренесе дописничката на МИА.
Вечерва ќе биде прикажан филмот „Малена“ („Malena“) на Џузепе Торнаторе, со кој Белучи стана светски позната, а дополнително ќе ѝ биде доделена наградата „Златен Александар“ за нејзиниот севкупен придонес во кинематографијата.
Проекцијата на филмот „Марија Калас, писма и мемоари“ („Maria Callas: Letters and Memoirs“) е во рамките на одбележувањето на годината на Калас, по повод стогодишнината од раѓањето на сопранот.
ВИДЕО | Моника Белучи и Тим Бартон блескаат од љубов: Прошетаа заедно на црвениот тепих