Украинскиот претседател Володимир Зеленски денеска пристигна во Белата куќа, каде што го пречека американскиот претседател Доналд Трамп, јави „Скај њуз“.

Двајцата лидери позираа пред камерите пред почетокот на нивната средба во Вашингтон.

Во пресрет на состанокот, агенцијата „Ројтерс“ објави дека Зеленски подготвил специјална презентација за Трамп, со која планира да објасни како Украина би ги користела крстосувачките ракети „Томахавк“, доколку САД се согласи да ги испорача.

Според информациите, Киев верува дека овие ракети, со дострел поголем од 1.600 километри, би можеле значително да го променат текот на војната — овозможувајќи напади врз цели длабоко на руска територија, меѓу кои и енергетски постројки и воени бази.