ФОТО+ВИДЕО | Во Италија пронајдени совршено сочувани бронзени статуи стари 2.300 години
Во подрачјето на Токсана, Италија, пронајдени се 24 антички бронзени статуи стари околу 2.300 години.
Италијанската новинска агенција АНСА објави дека во текот на истражувањето во Сан Кашано деи Бањи се пронајдени добро сочувани статуи, а пет од нив се високи над еден метар.
Бронзените статуи се добро сочувани благодарение на калта на дното на термалниот базен во кој се наоѓале. Наведено е дека покрај статуите, пронајдени се и неколку плочи со натписи на латински јазик и неколку илјади монети.
Научниците утврдиле дека откриените статуи се од периодот помеѓу вториот век пред новата ера и првиот век од оваа ера, а кои ги претставуваат грчките и римските божества.
Меѓу фигурите на различни грчко-римски богови се и статуите на Хигија и Аполон, а под бањата каде што се пронајдени се чуваат околу 6.000 бронзени, сребрени и златни монети кои датираат од периодот меѓу вториот и првиот век п.н.е..
Археологот Јакопо Таболи, шеф на тимот од Универзитетот за странци во Сиена, рекол дека повеќе од 60 научници биле вклучени во истражувањето.
Добро сочуваните статуи, кои ги „спасила“ водата, ќе бидат преместени во лабораторијата за реставрација во блиското Гросето, по што ќе бидат изложени во новиот музеј во Сан Кашано.
Министерот за култура на Италија, Џенаро Санџулијано, изјавил дека ова е извонредно откритие кое потврдува дека Италија е земја со исклучително вредни и уникатни богатства.
Италијанските медиуми пишуваат дека ова е едно од најголемите културни откритија во земјата од 1972 година, кога биле пронајдени статуите на Риаце стари 2.500 години.