ФОТО/ВИДЕО | Самохраните родители маршираа низ Скопје: Не бараме сожалување, туку права!
Протестен марш на организацијата „Една може“ се одржа денеска во центарот на Скопје. Самохраните родители отидоа пред Министерството за труд и социјална политика, каде ги испорачаа своите барања и препораки.
Меѓу нив се: дефинирање на термините самохран родител и еднородителско семејство, допрецизирање на постојаните права и нивно реформулирање, помагање на самохраните мајки за решавање на станбеното прашање, создавање механизми за квалитетно вработување на самохраните мајки, како и анализа и преобмислување на системот на социјални и парични бенефиции.
Самохраните родители побараа и прецизни статистички показатели за бројот и состојбата на самохрани родители на национално ниво, како и приспособување и зголемување на учеството на жените самохрани мајки во општеството преку квоти.
Една од говорничките пред МТСП рече дека јавноста секојдневно е сведок на барем една тажна приказна и апел за помош, но и посочи дека тоа им создава потешкотии бидејќи и тие барем еднаш во животот се нашле во иста или слична ситуација.
„И додека ние, како членови на групата ‘Една може’, се трудиме со натприродни сили, да и помогнеме на секоја една којашто бара помош, државните институции молчат. Затоа денес, после долги години молчење, решивме конечно да го кренеме нашиот глас и јавно да ги побараме нашите права, и барем на момент да им доловиме како е да се биде и мајка и татко во исто време. Епа драги мои, верувајте, не е ни најмалку лесно“, рече таа.
Дополнително, говорничката ги повиканадлежните институции да обезбедат финансиска помош за секој самохран родител, без разлика на тоа дали е вработен или не.
„Во денешно време кога се соочуваме со големи покачувања на цените на производите, со една плата не може да се прехрани едно семејство, а камоли да се преживее месецот. Како и секое дете, така и нашите заслужуваат да имаат спокојно детство ии затоа уште еднаш, од името на сите нас, би ве замолила, конечно да нѐ слушнете и да ни го исполните ова наше барање, за, како што и кажува слоганот на оваа наша група: ‘секоја една да може’. Сите овие години си помагавме меѓусебно, една на друга, сега редот е на вас, државните институции да ни помогнете на сите нас, самохрани родители“, додаде говорничката.
Непосредно пред почетокот на маршот, претседателката на организацијата „Една може“, Дороти Пачкова, изјави дека нивната борба е децениска, а протестот е нешто кое досега не го направиле, и покрај сите легални механизми кои ги употребиле претходно.