Повеќе од 20 гипсени калапи на жртвите кои загинаа во катастрофалната ерупција на вулканот во Помпеја, Италија, беа изложени за првпат во четврток на постојана изложба.

Калапите, кои научниците ги нарекуваат „отпечатоци на болка“, драматично ја доловуваат точната положба на секој жител на градот кој починал во 79 година од н.е. Репродукциите се создадени со истурање течен гипс во празнините оставени од распаднатите тела во стврднатата пепел, пренесува „Еј-би-си њуз“.

– Кураторите сакаа „да им дадат достоинство на овие луѓе кои се како нас, жени, деца, мажи, кои починаа за време на ерупцијата, но во исто време да го направат разбирливо, инклузивно и некако радосно да се разбере што навистина се случило во Помпеја – рекол Габриел Цухтригел, директор на Археолошкиот парк „Помпеја“.

Измислена од Џузепе Фиорели во 1863 година, техниката на пресоздавање верно ја зачувува положбата, изразот на болката и деталите за облеката на жртвите, правејќи ги уникатни сведоштва. Истата, сè уште ја користи тимот научници кои спроведуваат истражувања во археолошкиот парк Помпеја.

Помпеја е единственото место во светот што овозможува собирање на ваков вид докази, овозможувајќи им на посетителите да ја видат репродукцијата на предметите што биле уништени и луѓето што живееле и починале во тој момент.

Ерупцијата на Везув убила околу 2.000 жители во градот, а вкупниот број на регионални жртви достигнал до 16.000. Градот Помпеја бил покриен со пепел, а подоцна се зацврстил од пирокластични текови.

За време на ископувањата во Помпеја, остатоците од над илјада жртви на ерупцијата биле пронајдени заробени во нивните домови или засолништа, закопани од дожд од пемза и вулкански карпи, или убиени од уривањето на покривите и ѕидовите под тежината на вулканскиот отпад, кој достигнал висина од околу три метри.

Дваесет и двете одлеани остатоци биле избрани меѓу најдобро зачуваните остатоци. Жртвите биле пронајдени низ целиот град, од внатрешните области до портите и патиштата што воделе надвор од градот, каде што жителите избегале во потрага по безбедност.

– Тие имаат силен емоционален ефект врз посетителите и можат да бидат многу трогателни – рекла Силвија Мартина Бертесаго, археолог во Археолошкиот парк Помпеја.

– Преку анализите што можеме да ги спроведеме денес со сè понапредни техники, можеме да ја разбереме и нивната возраст и пол, но и дали имале одредени болести или одредени видови исхрана – додала таа.

Изложбата е сместена во тремовите на Палестра Гранде, сместени спроти амфитеатарот. Освен простор посветен на човечки остатоци, таа вклучува и изложби на наоди како што се растенија и храна што останале закопани со векови под метри пепел и лава.