ФОТО | Тиражот на „Епл дејли“ се зголеми по рацијата: Луѓето чекаат ред за да купат весници, продадени се милион примероци
Тиражот на продемократскиот весник „Епл дејли“, чии уредници се обвинети според Законот за национална безбедност во Хонг Конг, денес достигна половина милион примероци, што е зголемување за повеќе од шестпати во споредба со претходниот ден кога биле продадени 80 000 примероци, објави Ројтерс.
Имено, полицијата во Хонг Конг вчера уапси петмина новинари од продемократскиот весник „Епл дејли“, вклучувајќи го и главниот уредник Рајан Ло, при претрес во просториите, повикувајќи се на Законот за национална безбедност.
Новинарите беа уапсени поради постоење на „договор со странска земја со цел да се загрози националната безбедност“, соопшти полицијата.
Во претресот на канцелариите на весникот учествуваа околу 500 полицајци, со тврдењето дека неговите извештаи го кршат Законот за национална безбедност, пренесе вчера Би-Би-Си.
Во акцијата е замрзнат и имот и актива во вредност 2,3 милиони долари, сопственост на три компании поврзани со „Епл Дејли“. Весникот е во сопственост на Џими Лаи, кој е во затвор по повеќе обвиненија.
Познато е дека весникот „Епл Дејли“ е критички настроен кон кинеското државно раководство.
На брифинг со новинарите, полицијата соопшти дека од 2019 година „Епл Дејли“ објавил повеќе од 30 написи во кои се повикуваат земјите да воведат санкции против Хонг Конг и континентална Кина.