ФОТО: Тетово тоне во смет, сите јавни површини претворени во депонии и пасишта
Запустени и обраснати тревници, коњи кои се напасуваат во единствената зелена површина во градот „Жена парк“, слободни јавни површини каде се фрла смет, а никој не го собира, места налик на диви депонии. Ваква е сликата во долниот дел на Тетово во близина на Автобуската станица.
Локацијата околу градската спортска сала која наместо за спортски активности се издава под наем за трговски и производствени дејности „тоне“ во смет. Преполни контејнери и отпад околу нив.
„Ова место и околината околу него треба да биде пример оти се работи за една од ретките јавни слободни површини малку подалеку од урбаната џунгла, но гледате во каква состојба е. Намерно ваквите површини се запустуваат и не се уредуваат, за на крајот некој да дојде за да ги купи и тука да изгради огромна висококатница, и овој простор да се „узурпира“, како и останатиот дел од Тетово, вели еден жител на Тетово.
И единствената слободна зелена површина „Жена парк“, не се одржува, а хигиената таму според објавените фотографија е на катастрофално ниво. Сметот не се подига редовно, оштетените клупи и детски реквизити не се заменуваат и санираат.
„Тука и општината е виновна, но и народот во Тетово стана ужасен. Нема никаква култура, се што е јавно добро да се уништи. За нас треба казни да ни дојде памет, ама и казни зошто голема анархија владее“, вели друг тетовец.
Подобра не е состојбата и во останатите делови од Тетово.
Од комуналното претпријатие и Општина Тетово, велат дека состојбата ќе се подобри, откако ќе заврши реорганизација на вработените и поделбата на ЈКП Тетово на три правни субјекти, за водовод и канализација, паркови и зеленило и сектор за менаџирање со сметот. Така претпријатието како што велат ќе функционира поефикасно.