Со многу емоции и пред полна сала, „Битолски оркестар Дива“ во четвртокот го одржа концертот „Тоше, засекогаш во срцата“ во Центарот за култура во Битола.

На концертот настапија врвни пејачи и секој хит од Тоше беше одлично избран за секој вокал.

Осма година по ред, Битолскиот оркестар на чело со диригентот Владимир Димовски го организира овој настан, на идеја на актерката Маја Андоновска-Илијевски, поранешна директорка на Центарот на култура. Таа му е сестра на пејачот Димитар Андоновски, кој фантастично испеа неколку песни од Тоше, а Маја со сопругот и со синот го бодреше од првиот ред.

– Мојата идеја немаше да стане реалност без вербата на Владимир Димовски. Тоа беше наш прв заеднички проект, а оваа година додека седам во публика преполна со емоции, овој концерт го доживеа и осмото издание. Ти благодарам Владе, што иако годинава за првпат не доби поддршка од Министерството за култура, направи сѐ за концертот да се случи. Како и секоја година, и годинава плачев и се гордеев. Тоше беше еден и останува „Засекогаш во срцата“ – напиша Андоновска на Инстаграм.

Во последно време ниту еден концерт на оркестарот „Дива“ не поминува без Ана Петановска, „чудо од дете“ и чудо од вокал. Петановска е од лекарска фамилија, студира психологија, но слободно може да држи часови по пеење. Ана Петан докажа дека е светски глас многу пред овој концерт, а сега тоа само го потврди.

– Да продолжиме да го чуваме она што ни го остави Тоше, да ја негуваме неговата музика како наше наследство – рече Ана при крајот од концертот.

На домашен терен пееше и битолчанецот Бојан Стојков, вокално одличен, видно ослабен и во добра форма.

Изненадување на вечерта беше младиот Алексеј Ивановски, кој заедно со Стојков ја испеа „My Little One“, дуетот на Тоше со внук му Кристијан. Редовна на концертите на оркестарот е енергичната Јасна Димитровска со која публиката редовно пее и танцува.

За жал, иако беше најавена, Наде Талевска од здравствени причини не можеше да настапи, но дојде во публиката да ги поддржи колегите. Дел од планираните песни за неа, освен Ана Петановска испеаја и Марија Митровска, Марија Јаковлеска и Биљана Талевска. Симпатичен момент беше кога некој од публиката довикна: „Браво Владе“, наменето за диригентот.
Секоја чест за Биљана Талевска, која пееше придружни вокали во текот на целиот концерт, но на крајот излезе напред како главен вокал и како од шега маестрално ја испеа „Немаш ни благодарам“. При крајот од песната се изгаснаа светлата и на видеобим го видовме Тоше, онаков каков што го паметиме, насмеан, среќен и полн со љубов.

– Ве сакам од дното на срцето и на душата – се зборовите на Тоше на кои од дел од публиката се расплака.

Шлагот на крајот беа најмалите пејачи. Основци од училиштето „Гоце Делчев“ од Битола излегоа со светилки од публиката и заедно со Ана Петановска и со сите учесници ја изведоа „За овој свет“, песна што Тоше ја испеа во 2004 за УНИЦЕФ. Тој беше член на УНИЦЕФ и регионален и национален амбасадор на добрата волја.

Традицијата што осум години ја одржува битолскиот оркестар е за голем аплауз. Без говори, со музиката на Тоше и негови фотографии на видеобим, музичарите и публиката достоинствено го чуваат споменот на него.