Фудбалската репрезентација на Македонија од денеска официјално ги стартуваше подготовките за претстојните контролни натпревари против Босна и Херцеговина (29 мај) и Турција (1 јуни). Новиот селектор Гоце Седлоски ги собра репрезентативците во Скопје, каде националниот тим е сместен во хотелот „Хилтон“.

Македонските фудбалери нема долго да останат во главниот град, бидејќи експедицијата наскоро заминува за Сараево, каде во петок ќе го одигра првиот пријателски меч против селекцијата на Босна и Херцеговина.

Вториот тест за „црвено-жолтите“ е закажан за следниот понеделник во Истанбул, каде Македонија ќе се соочи со Турција.

Овие два натпревари ќе бидат прв вистински предизвик за Седлоски на клупата на националниот тим, со јасна цел, формирање конкурентна репрезентација која ќе биде подготвена за настапите во Лигата на нации.