Споменикот на паднатите херои на Македонија во паркот „Жена-борец“ во центарот на Скопје – триделната масивна градба во паркот спроти Собранието позната по скулптурата на Прометеј, е „удавен“ во ѓубре, пластични шишиња и паднати лисја.

Посебно е загадена „агората“ со „концентричен форум“, со белиот мермер прекриен со темнозелена мов која изгледа не само грдо, туку и опасно. За овој дел од споменикот, авторот Томе Аџиевски велеше дека е замислен „да се седи околу фонтаната и да се дебатира за секојдневниот живот, нешто како парламент на отворено, симбол на слободата на говорот и јасната определба на граѓаните“.

На местото каде што некогаш гореше огнот што требаше да биде вечен, сега има шприц и, како и насекаде околу – есенва паднати и несобрани лисја. Целиот простор на своевидниот споменичен комплекс е преполн со пластика, скршени стаклени шишиња и секакво ѓубре и изгледа како никој да не подзачистил со месеци.

Споменикот на Паднатите херои на Македонија беше подигнат како дел од контроверзниот проект „Скопје 2014“, во време на владеењето на ВМРО-ДПМНЕ и премиерот Никола Груевски. И во рамките на целиот градежен мегапроект со кој од корен се промени изгледот на центарот на Скопје, овој споменик беше посебно контроверзен и во фокусот на критичарите, особено откако скулптурата на Прометеј беше накнадно преправана. Кога неименувани женски организации се побунија дека било срамота приказот на митскиот антички херој да биде гол, авторот Аџиевски ѝ додаде гаќи на скулптурата.

Триделниот споменик чинеше 2,36 милиони евра.