ФОТО: СДСМ тврди дека анкетите на МТВ се лажни и нарачани, ВМРО-ДПМНЕ демантира и најави тужба
СДСМ објави документ во кој наводно анкетите објавени на Националната телевизија МТВ за рејтингот на партиите се нарачани од штабот на ВМРО-ДПМНЕ. Според владејачката партија, ова се лажни анкети и претставува голем скандал.
Се потврдува дека лажните анкети објавени на Националната телевизија МТВ се нарачани од штабот на ВМРО-ДПМНЕ. Станува збор за реализација на цела шема, оперативен план подготвен од Републичкиот изборен штаб на ДПМНЕ на 05.12.2023 година за пласирање на лажни анкети за рејтинзите на партиите и за политичарите, а објавени на МТВ, но и за други активности како пласирање лажни вести. Документите со потписи потврдуваат дека оперативниот план на ВМРО-ДПМНЕ го содржи она што и реално се случува, велат од СДСМ.
ВМРО-ДПМНЕ преку соопштение ги демантираше овие информации и најавија тужба за клевета.
Потписите на документот се целосно измислени и не кореспондираат со реалните. Иако видовме дека за СДС е нормално да го погрешат презимето на нивниот лидер Ковачевски веројатно разумно и логично е ВМРО-ДПМНЕ да си ги препознава луѓето и потписите од својата партија, нешто што не е случај и во посочениот и измислен документ, што само кажува кој е изворот на веста – се вели во соопштението од партијата.
Од ВМРО-ДПМНЕ побараа СДСМ да се извини, во спротивно ќе следи тужба за клевета.