Македонската продуцентка на визуелни ефекти Александра Кочоска-Дековиќ синоќа присуствуваше на првиот дел од 75. доделување на престижните награди Еми, каде беа доделени признанијата на најдобрите во техничките категории.

Оваа година, таа го придружуваше нејзиниот сопруг Анте Дековиќ, кој беше номиниран за Еми во категоријата за  исклучителни специјални визуелни ефекти во поединечна епизода, за епизодата „Rusalye“ од серијата „Сенка и коска“ („Shadow and Bone“).

„Апсолутно ни ја ‘украдоа’ статуетката, но сепак се забавувавме на 75. доделување на креативните Еми награди“, напиша Анте Дековиќ на својот фејсбук-профил, каде објави неколку фотографии од црвениот тепих.

Парот пристигна во елегантно издание на црвениот тепих, каде особено внимание привлече дамата со својот долг син фустан и впечатливи салонки во истата боја.

Инаку, и самата Александра Кочоска-Дековиќ досега беше трипати номинирана за оваа престижна награда (2019, 2021 и 2022), а во 2021 година стана првата Македонка која добила Еми. Нејзиниот тим беше награден во категоријата за исклучителни специјални визуелни ефекти во поединечна епизода, за епизодата „Su’kal“ од серијата „Ѕвездени патеки: Откритие“ („Star Trek: Discovery“.

Да потсетиме, наредниот викенд (15 јануари) ќе бидат доделени и наградите Еми за најдобрите актери, продуценти и режисери, а тогаш ќе бидат избрани и најдобрите серии за изминатата година.

Македонка го живее американскиот сон: Од бебиситерка до кандидат за престижната ЕМИ награда