ФОТО: Полиција и пред куќата на Мијалков на Водно
Екипа на интервентната полиција утрово е стационирана пред куќата на поранешниот шеф на УБК, Сашо Мијалков на Водно. Мијалков од вчера попладне е недостапен, и полицијата не успеала да му го врачи решението за куќен притвор, што како мерка на претпазливост, на барање на обвинителството викендот го донесол Кривичниот суд.
ФОТО: „Мериот“ под полициска опсада, од Мијалков ни трага ни глас
Утрово полициска екипа го чекаше Мијалков и пред хотелот Мериот каде последно е виден вчера околу 14 часот, според извештаи на некои од медиумите.
Обвинителството побарало куќен притвор поради опасност од бегство во пресрет на објавувањето на пресудата за предметот Таргет-Тврдина в петок, а во кој Мијалков е еден од обвинетите.
Полицијата Мијалков вчера го бараше и на други адреси во Скопје, но не бил пронајден.
Обинителството во завршните зборови за Таргет-Тврдина побара максимална казна за Сашо Мијалков.
Тој е еден од обвинетите за нелегалното прислушување на над 20 илјади граѓани во периодот од 2008 до 2015 година. Според обвинителниот акт, преку три системи за следење на комуникациите во УБК, незаконски биле следени 4.286 телефонски броеви за кои воопшто не биле издадени судски наредби.
Пресудата за „Таргет – Тврдина” треба да биде објавена в петок, на 26 февруари.