ФОТО | Ново археолошко откритие во Египет: Откриени три нови гробници на истакнати државници во Луксор
Египетски археолози открија три нови гробници на високи функционери во некрополата Дра Абу ел-Нага, во близина на Луксор. Според официјалното соопштение на Министерството за туризам и антиквитети на Египет, гробниците датираат од периодот на Новото кралство (околу 1550 г. п.н.е.), еден од најзначајните периоди во историјата на древен Египет, пишува „Скај њуз“.
Препорачано
Археолозите успеале да ги идентификуваат имињата и титулите на починатите благодарение на натписите пронајдени во внатрешноста на гробниците. Министерството објави и фотографии од бројни артефакти и статуи кои биле пронајдени на местото на ископувањето.
Откритието доаѓа во пресрет на долгоочекуваното отворање на Големиот египетски музеј, кое се очекува летово. Во музејот ќе бидат изложени над 100.000 артефакти од богатото културно наследство на Египет, а ова ново археолошко наоѓалиште може дополнително да го зајакне интересот за културниот туризам во земјата.
Една од гробниците му припаѓала на Амум ем Ипет, државник од рамзескиот период кој работел на имотот на богот Амон. Иако дел од гробницата е тешко оштетен, сочуваните делови прикажуваат сцени од носење погребна опрема и гозби. Архитектурата започнува со мало двориште кое води кон влезот, а потоа продолжува со квадратна сала што завршува со ниша, чиј западен ѕид е уништен.
Останатите две гробници датираат од времето на 18. династија. Едната ѝ припаѓала на човек по име Баки, кој бил надзорник на складиште за жито. Неговата гробница има двориште кое води до главниот влез, а потоа продолжува со долго двориште налик на ходник, попречен премин и уште еден надолжен ходник што завршува со недовршена погребна комора.
Другата гробница му припаѓала на личност означена само со буквата „С“, која извршувала повеќе важни функции: бил надзорник во храмот на богот Амон во оазата, писар и управител на северните оази. Нејзината гробница содржи мало двориште со бунар, влез и попречен ходник што води кон недовршен надолжен премин.
Министерот за туризам и антиквитети на Египет, Шериф Фати, го оцени откритието како големо научно и археолошко достигнување. Тој нагласи дека ваквите откритија играат клучна улога во зајакнувањето на културниот туризам и во привлекувањето на посетители од целиот свет кои се заинтересирани за египетската историја и култура.
