Без никаков ред, на влезот на Основниот суд Скопје 2 претпладнево има навала на странки. Не се почитуваат рестриктивните правила кои предвидуваат држење дистанца, носење лична заштита и дезинфекција пред влезот во судската установа.

Од Судот во изјава за „Слободен печат“ велат дека гужвите се поради прибавување документи за надоместок за трето дете.

„Кај нас во моментов, меѓу останатото, доаѓаат странки поради прибавување документи за надоместок за трето дете. Во таа постапка се издава и судски документ дека не е одземено родителското право на одредено лице  оттаму се создава целиот метеж.  Во објектот на судот се запазени сите протоколи и заштитни мерки, на влезот се мери и температура и има поставено дезинфициенси, но и покрај сите мерки кои ги преземаме за да нема групирање и пред објектот на судот дел од граѓаните истите не ги почитуваат.

Поставивме и метални обрачи за да се канализираат сите странки со растојание, протоколите се огласени на секој чекор, а судската полиција и службениците од судот, како внатре, така и надвор апелираат да се почитуваат мерките, но тука запираат нашите надлежности и понатаму се останува на совеста на граѓаните“, велат од Судот.

Станува збор за граѓани кои се уште имаат право да ја користат мерката за надоместок за трето дете, а дел од метежот го прават и пред банката во непосредна близина, каде решаваат да ја подмират уплатницата, додаваат од Основниот суд 2.