Членот на македонската женска сениорска ракометна репрезентација, Ангела Јанкуловска (23) од следната сезона ќе настапува во Словачка.

Нашата репрезентативка, која игра на позицијата лев бек, од натпреварувачката сезона 2026/27 ќе го носи дресот на Дунајска Стреда.

Јанкуловскa изминатите две сезони играше во Чешка за екипата на Славија Прага што е нејзин прв трансфер во странство. Со Славија Прага успеа да стане шампион на Чешка, а Јанкуловска со своите голови беше една од најзаслужните за големиот успех.

Претходно, беше дел од ракометниот клуб Ѓорче Петров со кој успеа да дојде до три титули шампион на Македонија, а стигна и до четвртфиналето во Европскиот куп на ЕХФ.

Исто така, во својата клупска кариера на домашната ракометна сцена го носеше и дресот на Куманово и Пелистер.

Дунајска Стреда во текот на минатата натпреварувачка сезона заврши на второто место во првенството, а дојде до титулата во регионалната МОЛ лига.