Во Зоолошката градина во Тексас, САД, се роди критично загрозено бебе горила со царски рез, што е првпат во историјата на зоолошката градина, пишува „Гардијан“.

Бебето Џемила, горила од западната низинска област, било породено од тим медицински експерти на 5 јануари во зоолошката градина „Форт Ворт“, Тексас.

Мајката на младенчето Џамила, 33-годишната горила по име Секани, требала да се породи природно на почетокот до средината на февруари. Но, Секани брзо развила симптоми на прееклампсија, компликација на бременоста забележана кај луѓето и приматите што предизвикува висок крвен притисок.

Плашејќи се за здравјето на Секани и нејзиното младенче, ветеринарниот тим на зоолошката градина одлучил дека Секани ќе мора да го роди своето бебе предвреме со царски рез.

„По тестирањето што ја потврди оваа дијагноза, утврдивме дека е неопходна интервенција за да се спаси Секани и да се даде на нејзиното неродено бебе најдобра шанса за преживување“, изјавил Џон Грифиоен, помошник директор за програми за животни и заштита на зоолошката градина, за време на прес-конференција.

Чуварите на зоолошката градина во „Форт Ворт“ брзо побарале помош од експерти за човечка гинекологија, бидејќи репродуктивните системи на приматите и луѓето се речиси идентични. Д-р Џејми Вокер Ервин, акушер и гинеколог од „Форт Ворт“, била консултирана да помогне во пораѓањето на Секани. Ервин собрала  тим кој помогнал да се роди бебето Џамила, вклучувајќи анестезиолог и неонатолог. И мајката и ќерката биле во добра здравствена состојба и покрај комплицираната процедура.

„Ова е можност која се дава еднаш во животот…Обично оперирам луѓе“, изјавила Ервин.

По процедурата, чуварите на зоолошката градина обезбедиле соодветна грижа за Џамила, додека Секани закрепнувала од операцијата.

За жал, Секани не покажала интерес за повторно спојување со бебето Џамила. Но, чуварите на зоолошката градина во „Форт Ворт“ велат дека се во процес на обука на друга горила, 24-годишната Грејси, да се однесува како сурогат мајка на Џамила.

„Чуварите на зоолошката градина се надеваат дека Грејси ќе биде идеална сурогат мајка, покажувајќи мајчински однесувања кои ќе бидат неопходни за бебето да напредува: држење и носење на доенчето, заштита, соработка со чуварите на зоолошката градина за време на хранењето и учење на малечката за неопходните социјални вештини што ги треба да биде горила“, изјавил портпаролот на зоолошката градина во „Форт Ворт“.