Иконата на светската модна сцена, Наоми Кемпбел, докажа дека сè уште е една од најбараните супермодели, откако во вторник навечер прошета на пистата по повод ревијата DSquared2 на Модната недела во Милано.

54-годишната „црна пантера“, како што ѝ ласка модниот свет, се појави во црно боди во стил на кожна јакна и црни високи чизми, додека косата ѝ беше виткана. Убавицата ги привлече сите погледи додека чекореше по пистата заедно со колешките манекенки Ирина Шајк и Изабели Фонтана. Иако Наоми наскоро ќе наполни 55 години, на модните писти сè уште се снаоѓа како риба во вода.

39-годишната Ирина прошета во црн, чипкаст фустан што го откриваше нејзиниот долен веш, а на себе имаше и дебела зимска јакна и огромна крзнена капа на главата.

41-годишната Изабели малку остави на имагинацијата со разлетаниот кафен фустан, кој речиси сè откриваше од страните, па гледачите можеа да ги забележат нејзините препознатливи витки нозе.