Под слоганот „Дамите бираат“ синоќа се одржа првиот, од двата закажани концерти на популарното македонско дуо Драган Спасов – Дац и Александар Митевски, во МНТ, а по повод Денот на жената.

Пред самиот почеток на концертот, присутните беа пречекани во фоајето на МНТ со пијалак за добредојде и музика од диџеј Миле Ѓуриќ.

Концертот започна половина час по осум, а публиката уживаше речиси два часа, во вечер исполнета со љубов, емоции и музика што допира до душата.

Дац и Александар преку песна, посебна сценографија и искрена емоција, на големата сцена на МНТ ја раскажаа заедничката приказна која трае веќе седум години.

– Приказната започнува пред седум години кога еден глумец и еден композитор се сретнаа на една забава и на една песна се „фатија“ заедно за еден микрофон. Тогаш Григор Компров рече: „Вие треба да направите песна, заедно“. На крај се убедивме и излезе нашата прва песна којашто се вика „Цреши охридски“ – раскажа Дац и го најави почетокот на концертот.

Во текот на двата часа тие ги изведоа нивните заеднички хитови, но и добро познати евергрини, кои нивната верна публика ги слуша на нивните настапи низ Македонија.

Дуото беше придружувано од своите соработници и пријатели – бендот „Дрим тим“, а во текот на концертот како специјални гости на сцената се појавија, хорот на „Златно славејче“, Билјана Ѓошева, Дејан Николовски – Чуле од „Дрим тим“, и легендарните Росана Сариќ-Тодоровска и Виолета Томовска.

Во еден глас, заедно со Дац и Александар се пееја нивните песни „Уште ми фалиш“, „Воли ме, сакај ме“, „Душа бакшиш“, „Корона чао“, како и добро познатите „Оливера“ и „Девојка са чардаш ногама“ на Ѓорѓе Балашевиќ и „Кажи нешто драга“ на Драган Мијалковски. Публиката ги слушна и хитовите „Срце тетовирано“ и „100 проценти фанки“ на Александар Митевски.

Добрата атмосфера во салата на МНТ ги понесе присутните да станат од своите столчиња и да танцуваат во ритамот на музиката во текот на целиот концерт.

Вечерта беше полна и со многу изненадувања, Дац ја рецитираше „Умилкување “ од Петре М. Андреевски, на сцената се појавија нивните сопруги Весна и Ана, а публиката беше сведок и на едно запросување.

Концертот заврши со песната „Уште ми фалиш“, за чија изведба овој пат на сцената беше повикан и Никола Кимовски, директорот на МНТ, кој му се придружи на бендот и засвире на тапани.

По концертот видно расположената публика уживаше во опуштен коктел, со музиката на Боби Јоргушевски, додека имаа можност да се дружат со ѕвездите на вечерта – Дац и Александар.

За „Слободен печат“, Дац накратко ги откри своите први впечатоци од оваа магична вечер.

– Успеавме да ја дигнеме публиката на нозе. Мислам дека беше убав концерт и ние сме задоволни. Целиот бенд е задоволен, убаво помина сѐ – изјави Дац.

Вториот концерт „Дамите бираат“ на Дац и Александар е закажан за вечерва, 7 март во салата на МНТ.