Маестрална, елегантна и со уникатна харизма, Маја Оџаклиевска блесна на годинашното издание на фестивалот „Белградска пролет“, каде што заслужено ја доби наградата за животно дело.

На сцената, 72-годишната Оџаклиевска изгледаше одлично – стилски дотерана во елегантен, краток фустан, со впечатлив сценски настап и енергија што и понатаму ја потврдува нејзината уметничка виталност. Таа го испеа својот голем хит „Даљине“ и со својот изглед и самодоверба уште еднаш покажа дека вистинскиот стил и шарм не познаваат години. Публиката ја поздрави со долги аплаузи, а нејзиното присуство внесе посебна емоција во вечерта посветена на музичките легенди.

Годинашното издание на фестивалот имаше силна симболика – се одбележаа 65 години од првото издание, одржано на 17 април 1961 година, кога започна традицијата што изгради генерации музички великани. Настанот беше посветен токму на тие имиња кои оставија неизбришлива трага во историјата на „Белградска пролет“.

Покрај Оџаклиевска, награди за животно дело добија и Борис Бизетиќ, Лео Мартин, Нада Павловиќ и Радмила Караклајиќ, додека признанија им беа доделени и на Жарко Данчуо и Драган Мијалковски.

На сцената настапија и Душан Свилар, Принц од Врање, Наташа Михајловиќ, Зејна и нашите Ана Петановска и Даниел Кајмакоски, изведувајќи песни од легенди како Бети Ѓорѓевиќ, Бисера Велетанлиќ, Оливер Драгојевиќ, Арсен Дедиќ, Габи Новак и Лола Новаковиќ.

Посебен момент беше појавувањето на Ладо Лесковар, кој доби признание во 2022 година, а годинава му беше врачена монографијата „Април у Београду“ од Бранислав Кланшчек.

Фестивалот заврши со заедничка изведба на безвременскиот хит на Здравко Чолиќ, со што уште еднаш се потврди духот на „Белградска пролет“ како симбол на традицијата, емоцијата и врвната музика.