Генералниот секретар на НАТО, Марк Руте при денешната агенда во Скопје ја посети претседателката Гордана Сиљановска-Давкова, оствари средба со премиерот Христијан Мицкоски, а појде и во Собранието, каде што пратениците на Левица го пречекаа со своја порака.

Тие пред говорницата отворија голем транспарент, на кој пишуваше „НАТО убива за профит“.

На агендата на Руте беше негово обраќање пред пратениците во законодавниот дом.

Руте ќе ја посети и касарната „Илинден“ каде што ќе присуствува на презентацијата на лесна пешадиска баталјонска група (ЛПБГ) на Армијата и на дел од опремата на оваа единица.

Ова е прва посета на Руте како генерален секретар на НАТО на Скопје. Тој беше во земјава во ноември 2021 година како тогашен премиер на Холандија.

Во 2023 година во официјална посета на Македонија престојуваше тогашниот прв човек на НАТО, Јенс Столтенберг.

Фото: Методи Здравев / „Слободен печат“