Студија на ирската компанија за патничко осигурување „Џаст кавр“ (JustCover) го издвои Лисабон како најшарениот град во светот, пишува „Еуроњуз“. Во анализираните фотографии од португалската престолнина биле откриени повеќе од 2,6 милиони бои, а на листата се најде и еден град од нашето соседство.

Во време кога патувањата сè повеќе се документираат на социјалните мрежи, естетиката и визуелниот впечаток стануваат важен фактор при избор на дестинација, особено за оние кои уживаат во фотографирање и создавање содржини. Според истражувањето, токму во визуелните прикази на Лисабон се регистрирани повеќе од 2,6 милиони нијанси.

Португалската престолнина е позната по своите пастелни згради и декоративни плочки што ги покриваат историските квартови како Алфама, како и по жолтите трамваи што се движат низ тесните улици.

На второто место се најде Куала Лумпур во Малезија, кој се издвојува по впечатливиот контраст меѓу модерните облакодери и традиционалните објекти, вклучувајќи украсени храмови и светилишта. Скалите во боите на виножитото во Бату пештери се една од најпознатите атракции поврзани со оваа дестинација.

Третото место му припадна на Порто, со што дополнително се нагласува присуството на Португалија на листата. Карактеристичните теракотни покриви и шарените куќи покрај реката Доуро го прават овој град лесно препознатлив.

На четвртото место е пристанишниот град Картагена во Колумбија, познат по своите живописни бои, додека Рио де Жанеиро во Бразил е на петтото место, со повеќе од 2,3 милиони уникатни бои забележани на фотографиите. Меѓу најпознатите атракции таму се скалите на Хорхе Селарон, покриени со шарени плочки.

За оваа анализа биле користени репрезентативни дневни фотографии од секоја локација, без силни филтри, а потоа со специјална алатка бил утврден бројот на бои присутни на сликите, со цел да се издвојат најживописните дестинации.

Ова се 15-те најшарени градови во светот:

1. Лисабон
2. Куала Лумпур
3. Порто
4. Картагена
5. Рио де Жанеиро
6. Гванахуато
7. Хавана
8. Ханој
9. Њу Орлеанс
10. Меделин
11. Дубровник
12. Сингапур
13. Антигва
14. Барселона
15. Њујорк