Министерството за политички систем, Агенцијата за остварување на правата на заедниците, Националниот албански ансамбл, како и повеќе Дирекции за афирмација на заедниците ќе бидат корисници на простории во новата зграда во близина на МНТ и на МНР што денеска беше пуштена во употреба.

На свеченоиста присуствуваа лидерите на СДСМ и на ДУИ, Зоран Заев и Али Ахмети, претседателот на Собранието, Талат Џафери, потпретседателите на Владата, Артан Груби и Љупчо Николовски и други. Објектот е изграден во барок стил, дел од проектот „Скопје 2014“, ѕидовите се „покриени“ со десетици уметнички фотографии, опремен е со кожни гарнитури во честерфилд стил, итн.

– Новиот простор, благодарение на можноста на самата Влада, министрите под раководство на првиот потпретседател на Владата, од голем дел на заштедените средства уплати 620 милиони денари или 10 милиони евра на Акционерското друштво за станбен и деловен простор за да ја откупи зградата што го врати кредитот. Државата си врати кредит со овие пари, притоа доби едно ново Министерство, рече Заев.

Иако во новиот објект беше предвидено да се смести и Државната Комисија за спречување на корупција (ДКСК), Владата, сепак, се откажа од идејата. Во тој контекст Заев истакна оти предност за простории се дала за владини институции и истакна дека Владата одлучила да одвои пари за реновирање на веќе постојните канцеларии на ДКСК.