Граѓани претпладнево, на овој Осми Март одбележан од страотната трагедија во скопската населба Тафталиџе, оставаат цвеќе на местото на кое животите ги загубија Ивана Јовановска и нејзината шестгодишна ќерка, Катја – долготрајни жртви на брутално семејно насилство.

Во Скопје денеска се одржува протестен марш, кој е посветен на борбата против насилството врз жените. Учесниците ќе побараат државата конечно да го сфати сериозно проблемот со семејното насилство и соодветно да ги заштити жените жртви. Јавноста деновиве бараше и одговорност од државните институции, од полицијата и социјалните служби, затоа што не успеале да го спречат долготрајното насилство од сопругот и татко на Ивана и Катја, Стојанче, кое траело сè до самиот момент кога 31-годишната мајка се одлучи на очајничкиот чин – да се самоубие заедно со своето дете.

Протестниот марш ќе тргне точно напладне од паркот „Жена-борец“.