Å е мало рибарско село, кое е сместено на крајот на архипелагот Лофотен, кој го означува крајот на автопатот Е10.

Некогаш главен двигател на економијата бил риболовот, но денес фокусот е повеќе на туризмот, поради сѐ поголемиот број луѓе го посетуваат овој архипелаг.

Å е населба во Норвешка со најкратко име во светот. Ова рибарско село се наоѓа на самиот крај на патот, држава, континент, по што започнува Атлантскиот Океан. Во селото Å веројатно има повеќе галеби отколку луѓе. Овие птици се одомаќиниле, па речиси насекаде изградиле гнезда. На покривите, на штиците на прозорците и на други погодни места.

Å изворно се развило од мала фарма во важно рибарско место. Локалните жители, како и во многу рибарски села во областа, се специјализирале за индустриски риболов за масовна употреба. Меѓутоа, тоа било така сè до пред 30 години, кога целиот овој регион станал популарна туристичка дестинација. Денес, на риболов се оди рекреативно или со туристи.

Природата била наклонета кон овој дел од светот, што може да се види на секој чекор. Целиот овој крај е исполнет со интересни знаменитости и летниковци од кои можете да уживате во погледот на белите и црвените куќи во позадина или во погледот на морето и околните планини.

Во местото Å се наоѓаат и два музеи – „Лофотен стокфиш музеум“, посветен на производството на риба и „Норск Фискеварсмузеум“, музеј посветен на локалното наследство. Тука, исто така, можете да пронајдете една од најдобро зачуваните автентични стари рибарски населби во Норвешка, која нуди разни можности да искусите како изгледал рибарскиот живот во последните 250 години.

До Å може да се стигне со авион, траект или со автомобил. Поради Голфската струја, климата е блага, и покрај положбата, бидејќи се наоѓа северно од Арктичкиот круг. Од средината на мај до средината на јули можете да го доживеете полноќното сонце, а од почетокот на мај ноќите се речиси целосно светли.