Градоначалникот на Битола Тони Коњановски доцна вечерва објави дека моторно масло е излеано на една од најфреквентните улици во центарот на градот.

При изведување на градежни работи на приватен објект на улицата „Климент Охридски“, од градежна машина била излеана поголема количина моторно масло. По добиената пријава, Општинската инспекција веднаш излезе на терен и ја потврди состојбата, пренесува порталот Апла.мк.

Утврден е објекот на изведување на градежните работи и за ваквиот прекршок ќе биде изречена соодветна казна.

Екипите на ЈП „Паркинзи“ во координација со полицијата ќе постават вертикална сигнализација со цел поголема внимателност при возење на овој дел од коловозот, објави Коњановски.