Шафаг Новруз од Турција е професионална стилистка со искуство во шминкање и обликување фризури на невести. Еден ден ја запознала бездомничката Рита и била шокирана од тоа колку жената била запуштена. Шафаг одлучила да ѝ помогне и да ѝ покаже како, всушност, може да изгледа со малку нега и неколку трикови. Сакала да ѝ го врати достоинството и да покаже дека не е невидлива.

Рита живеела на улица, депресивна поради загубата на синот. Живеела со собирање шишиња и ќеси. Сакала да најде работа и да си го среди животот, но поради изгледот немала никакви шанси. Кога и да ја погледнале потенцијалните работодавци, ја свртувале главата од неа. Рита не верувала дека некогаш повторно ќе живее како човек.

Шафаг ја слушала нејзината животна приказна и тоа длабоко ја трогнало. Таа знаела дека нејзината физичка трансформација ќе ја отвори вратата за подобра иднина. Преобразувањето започнало со посета на стоматолог, каде Шафаг ги покрила трошоците за стоматолошките зафати за Рита да ја добие насмевката што ја заслужува. Последователното преуредување вклучувало маникир и педикир.

Подоцна следело нега на косата. Кратката и оштетена коса на Рита била обоена во руса и издолжена со помош на екстензии, давајќи ѝ поженствен изглед. Одела на третмани за убавина со помош на специјални козметички производи, била на депилација, на средување на веѓите и трепките, па на крај професионално нашминкана.

Кога Рита се погледнала во огледало, за малку ќе заплачела. Гледала во таа жена од другата страна и ѝ се чинело нереално дека навистина е таа. Изгледала помладо, поживо, посвежо и поздраво. Нејзините прекрасни, крупни темни очи дошле до израз, а нивниот сјај ѝ бил доволен показател на Шафаг дека успеала и дека ѝ ја вратила вербата на Рита во животот и во луѓето.

Таа рекла дека се чувствува поубаво и посамоуверено од кога било досега. Рита се надева дека нејзиниот нов изглед и посилната самодоверба ќе ѝ помогнат да најде работа, пренесува „Брајдсајд“ (BrightSide).