ФОТО | Александар Џамбазов доби мурал во Дебар Маало: Да го негуваме споменот на оние кои оставиле трага во својата професија
Македонскиот диригент и композитор Александар Џамбазов доби мурал во скопската населба Дебар Маало, соопштија од општина Центар.
Уметничкото дело, посветено на великанот на современата македонска музика, е насликано на ѕид близу ресторанот „Наџак“, на улицата Орце Николов.
Муралот го насликаа уметниците Драган Китановски – Драш и Марјан Димиќ – Мачка и е своевидно потсетување на музичкиот опус на македонскиот диригент, текстописец, композитор и основач на детскиот фестивал „Златно Славејче“.
По повод одбележување на неговото вечно заминување, на 25 јануари наредната година, општина Центар ќе организира настан со учество на познати македонски уметници и членовите на хорот „Златно славејче“.
„Да ги почитуваме и негуваме спомените и делата на познатите и еминентни личности кои оставиле трага во својата професија“, напиша градоначалникот на општина Центар, Горан Герасимовски.