Библиотеката „Браќа Миладиновци“, на 27 и 28 ноември ќе биде домаќин на две тематски дискусии во рамките на Форумот за интердискурзивен дијалог „Philosophia Christiana“, проект на фондацијата „Свети Фотиј Велики“ – Скопје.

Форумот функционира како отворена платформа за разговор и споредување идеи од различни философски, теолошки, социјални, етички и културолошки перспективи, со цел да го зајакне јавниот дијалог и критичкото мислење. Настаните започнуваат во 19 часот и се со слободен влез за сите заинтересирани.

Првата дискусија, насловена Homo Veritatis: За вистината во јавниот дискурс, ќе се одржи на 27 ноември. Учесниците ќе се обидат интердисциплинарно да го отворат прашањето за вистината и начинот на кој се гради, интерпретира и злоупотребува во современото општество. Гости на овој разговор се Дионисиос Склирис, професор по философија на Богословскиот факултет во Атина и новинар во неделникот To Vima, како и Ненад Марковиќ, професор по политички науки и еден од основачите на Институтот за демократија „Социетас Цивилис“. Дискусијата ќе се одвива на англиски јазик.

Следниот ден, на 28 ноември, ќе се одржи втората тема во рамките на форумот – Homo Religiosus: За човекот како религиозно битие. Овој разговор ќе ги допре значењата, улогата и интерпретациите на религиозноста во европската културна традиција. На панелот ќе учествуваат Сотирис Митралексис од Лондонскиот универзитетски колеџ (UCL) и Институтот за православни христијански студии во Кембриџ (IOCS), како и Александар Таковски од AAB Колеџот во Приштина. И оваа дискусија ќе се одржува на англиски јазик.

Организаторите најавуваат дека двата настана се отворени за јавноста и очекуваат посета од сите кои сакаат да ја продлабочат својата перспектива за улогата на вистината и религиозноста во современиот јавен и културен контекст.