Европа ќе направи „сè што може“ за да помогне во обновата на Сирија, вети денес претседателката на Европската комисија, Урсула фон дер Лајен, по средбата со сирискиот лидер Ахмед ал-Шара во Дамаск, додека крвавите битки меѓу армијата и курдските борци продолжуваат во Алепо, пренесува Анадолу.

„Европа ќе направи сè што може за да ја поддржи обновата и реконструкцијата на Сирија“, рече Фон дер Лајен во порака на платформата за социјални медиуми Икс, нагласувајќи дека „иднината на Сирија им припаѓа на сите Сиријци“.

In Damascus today with @eucopresident.

After decades of fear and silence, Syrians began a long journey toward hope and renewal.

Europe will do everything it can to support Syria’s recovery and reconstruction. pic.twitter.com/Bno3hAZzuM

— Ursula von der Leyen (@vonderleyen) January 9, 2026

Двете страни разговараа за прашања од билатералната соработка, како и за „хуманитарните прашања и прашањата за азил во Европа“, соопшти сириското претседателство.

Сирија е вовлечена во деликатна транзиција откако коалицијата на исламисти го собори Башар ал-Асад пред една година, по речиси 14-годишна граѓанска војна.

Европската унија на 20 мај ги укина сите економски санкции што ги воведе врз Сирија за време на режимот на Асад.

Неколку европски комесари веќе патуваа во Дамаск по падот на Асад, секој пат најавувајќи различни програми за помош за земјата што е уништена по години војна.

Во март 2025 година, ЕУ вети дека ќе обезбеди 2,5 милијарди евра за Сирија во текот на две години.

Светската банка проценува дека обновата на Сирија би можела да чини до 216 милијарди долари.

Двајцата европски претставници се на турнеја низ регионот и вчера, во четврток, го посетија Јордан, додека подоцна денес се очекува да го посетат Либан.

Во заедничка изјава издадена по нивните состаноци во Аман, ЕУ и Јордан ветија дека ќе продолжат да работат „за поддршка на мирна и инклузивна транзиција“ во Сирија.