Покрај проекциите на стотина анимирани филмови на петтото издание на фестивалот „Флипбук“ се одржаа промоции на четири книги, кои ги поврзуваат анимацијата и филмот.

Една од промовирание книги е со наслов „Кон Европа – по наш пат“ на Тоде Ристо Блажевски. Главен и одговорен уредник на „Флипбук“ е Жарко Иванов, уредник на изданието е Дарин Ангеловски, промотор на книгата на фестивалот беше Александар Прокопиев, а предговор во книгата напиша Владимир Јанковски.

– Книгата, или во жаргонот на карикатуристите, албумот „Кон Европа – по наш пат“ опфаќа стотина карикатури со различна тематика работени во различни техники. Покрај класични цртежи и акварели има карикатури што се работени дигитално, односно на компјутер, а некои карикатури се доближуваат до сликарските техники. Ова му овозможува на авторот да има поширок опсег не само во однос на она што го кажува, туку и како тоа го кажува. Од друга страна, авторот добива можност одредена идеја да ја поврзе со специфичниот ликовен израз, со цел да се постигне посуштински дијалог меѓу текстуалното и визуелното, односно ликовното – посочува Јанковски.

Тоде Ристо Блажевски е карикатурист, хуморист, есеист, аниматор и сликар роден на 6 мај 1948 година во Скопје. Со уметничка работа почнал да се занимава во 1965 година, а во јануари 1966 година, во весникот „Студентски збор“ – Скопје, ја објавил својата прва карикатура.

Оттогаш, па сѐ до денес, црта карикатури, цртежи и стрипови, пишува хуморески, афоризми и есеи за карикатурата, изработува анимирани и цртани филмови и учествува на меѓународни фестивали и симпозиуми на карикатури, изложби на слики, фестивали на карикатури и хумор, како и на фестивали на анимирани филмови. Досега имал четири самостојни, како и сто и дваесет групни изложби во земјата и во странство.

(Текстот е објавен во „Културен печат“ број 243, во печатеното издание на весникот „Слободен печат“ на 17-18.8.2024)