Царинската управа поднесе кривична пријава против едно правно и едно физичко лице поради нелегално вршење меѓународни поштенски услуги и криумчарење стока. При претресот биле пронајдени вкупно 166 поштенски пратки со разновидна стока, во вкупна вредност од 4.000 евра.

-Царински инспектори од Одделението за истраги, во координирана акција со МВР, УЈП, Агенцијата за пошти и Државниот пазарен инспекторат, извршија претрес на фирма која нелегално вршела меѓународни поштенски услуги и криумчарела стока. Во моментот на претресот беа пронајдени вкупно 166 поштенски пратки со разновидна стока, со вкупна вредност од речиси 240 илјади денари. Пронајдената криумчарена стока е запленета, а од страна на инспекторите е поднесена кривична пријава против едно правно и едно физичко лице за сторено кривично дело прикривање стоки кои се предмет на криумчарење и царинска измама – соопшти Царина

Утврдено е дека фирмата вршела меѓународни поштенски услуги без соодветна лиценца, при што пратките ги внесувала преку граница, без да ги пријави на царина.

– Пратките потоа нелегално ги складирала во магацин во нејзина сопственост, со намера оттаму да ги транспортира до нарачателите, за што би наплатувала паричен надомест – се вели во соопштението.